Новый Завет (на цсл., гражданский шрифт, с ударениями)

⁴² Прося́щему у тебе́ дай, и хотя́щаго от тебе́ зая́ти не отврати́.

⁴³ Слы́шасте, я́ко рече́но есть: возлю́биши и́скренняго твоего́ и возненави́диши врага́ твоего́.

⁴⁴ Аз же глаго́лю вам: люби́те враги́ ва́ша, благослови́те клену́щия вы, добро́ твори́те ненави́дящим вас, и моли́теся за творя́щих вам напа́сть и изгоня́щия вы.

⁴⁵ Я́ко да бу́дете сы́нове Отца́ ва́шего, И́же есть на небесе́х, я́ко со́лнце Свое́ сия́ет на злы́я и благи́я и дожди́т на пра́ведныя и на непра́ведныя.

⁴⁶ А́ще бо лю́бите лю́бящих вас, ку́ю мзду и́мате? Не и мытари́ [7] ли то́жде творя́т?

⁴⁷ И а́ще целу́ете дру́ги ва́ша то́кмо, что ли́шше творите́? Не и язы́чницы ли та́кожде творя́т?

⁴⁸ Бу́дите у́бо вы соверше́ни, я́коже Оте́ц ваш Небе́сный соверше́н есть.

Глава 6

¹ Внемли́те ми́лостыни ва́шея не твори́ти пред челове́ки, да ви́дими бу́дете и́ми, а́ще ли же ни, мзды не и́мате от Отца́ ва́шего, И́же есть на небесе́х.

² Егда́ у́бо твори́ши ми́лостыню, не воструби́ пред собо́ю, я́коже лицеме́ри творя́т в со́нмищах и в сто́гнах, я́ко да просла́вятся от челове́к. Ами́нь глаго́лю вам, восприе́млют мзду свою́.

³ Тебе́ же творя́щу ми́лостыню, да не уве́сть шу́йца твоя́, что твори́т десни́ца твоя́.

⁴ Я́ко да бу́дет ми́лостыня твоя́ вта́йне, и Оте́ц твой, ви́дяй вта́йне, той возда́ст тебе́ я́ве.

⁵ И егда́ мо́лишися, не бу́ди я́коже лицеме́ри, я́ко лю́бят в со́нмищах и в сто́гнах пути́й стоя́ще моли́тися, я́ко да явя́тся челове́ком. Ами́нь глаго́лю вам, я́ко восприе́млют мзду свою́.

⁶ Ты же, егда́ мо́лишися, вни́ди в клеть твою́, и затвори́в две́ри твоя́, помоли́ся Отцу́ твоему́, И́же вта́йне, и Оте́ц твой, ви́дяй вта́йне, возда́ст тебе́ я́ве.

⁷ Моля́щеся же не ли́шше глаго́лите, я́коже язы́чницы:

⁸ Мнят бо, я́ко во многоглаго́лании свое́м услы́шани бу́дут. Не подо́битеся у́бо им, весть бо Оте́ц ваш, и́хже тре́буете, пре́жде проше́ния ва́шего.

⁹ Си́це у́бо моли́теся вы: О́тче наш, и́же еси́ на небесе́х, да святи́тся и́мя Твое́,

¹⁰ Да прии́дет Ца́рствие Твое́, да бу́дет во́ля Твоя́, я́ко на небеси́, и на земли́.

¹¹ Хлеб наш насу́щный даждь нам днесь,

¹² И оста́ви нам до́лги на́ша, я́ко и мы оставля́ем должнико́м на́шим.